Saturday, July 24, 2010

HPAJI PRAT

Ka ai- Dr. Kha Lum

Moi anhte a ji woi ji wa ni gaw bum yi galaw sha ma ai. Mung du ni a nta hta lai nna kaga daroi darat ni gaw laning mi na mam laning mi tawnghkra n lu sha ai law ai majaw lanam ta du yang, nai htu sha, n-gawng(hkainu) sha, laisi krau sha nna lanam shalawt ai gaw shaning shagu ngu na daram rai nga ai. Jaugawng gawng, nga hkan sha, nam u hkam sha ai ni mung kalang lang hpa n lu sha ai rai nga ai. Hpaga yumga kun rai shatai na daram kadai mung n galaw shapraw lu ma ai.

Pa ga de du nna Sam amyu masha ni hte kanawn wa ai shaloi Wunpawng sha nkau mi hkau hting hkauna hte sun galaw sha chywe wa ai. Rai tim, maigan de dut sha na daram n lu galaw ma ai. Dai majaw ginhtawng htawng jang ri gawng, lam kuli galaw nna gumhpraw tam ma ai. Sharaw hpyi, chyhkyi hpyi, ya laswi, sharaw kyau ni galaw dut ma ai. Rai tim amyu shas yawng hpe bau u na daram n byin ma ai. Miwa hkra hte ni ai Zaiwa, Ngochang mashani gaw lawze gumra hte ndai hkran wora hkran hpaga ga sha chye ma ai. Raio tim, amyu sha yawng hpe pawn ba sharaw na daram hpaga lauban n nga ma ai. Myen hkawhkam hte Inglik du magam ni kaw hpyen shang, rung amu galaw nna chjyang sha lai wa ai ni mung tinang a dinghku hte makyin jinghku ni a matu daram hta jan nna nau wa n daw jau lu ma ai. Langai mi gaw nga ai. Mungkan ntsa e, Kachin State ngu ai Jinghpaw mungdaw hpe lu hkra jawm shakut nna hpyi da lu ai gaw chyeju n mai malap na ga ai. Rai tim, buga lu ai hte sha kan hkru ai n rai. Buga madu ni gaw jahpawt shana shat sha na pyi yak yak rai nga yang, tsi jahpu pyi n lu rai matsan nhkun sung nga yang, anga ai maigan masha ni she jaw sha nga ai hpe tatut mu mada ga ai. Dai majaw gumgai dingla ni hpe chyawm gaw kaning ngu hpaji n chye jaw sai. Aprat asak naw ram ai kasu kasha ni hpe yi bai n hkyen sha na matu,"Ma ni e, shanghkawp hte chye ai hta ballpen hte chye ai mahtang grau kaja ai yaw," ngu tsun mayu ai.

N-gun katsing hte marai 100 galaw na amu hpe hpaji hte, jak hte rai yang marai langai mi sha galaw kau nga ai. Dai majaw hpaji n chye, sutgan aarang nlu, jak n lang ai masha ni lani hte lani bungli n lu mat wa sai. Mahsa 100 galaw ai bungli hpe masha langai mi sha galaw jang ngam ai marai 99 bungli n lu mat sai. Yi bai hkyen sha na ngu yang Asuya ni company de garan dut shsa kau sai majaw moi nu wa ni yi hkyen sha ai shara de yi wa hkyen yang htawng rawng na rai nga ai. Moi nu wa ni madim jun sha ai shara mung sut madu ni garan dut sha kau sai majaw bahkyi ga kajai, hkatsu chyahkan pyi n mai hta sha sai. Majoi shingra de bai wa na ngu yang Mongolia she rai mat sai. Lawt lam langai mi nga ai. Shinggyim mmashs gaw shaning hkying kade hpang hkrat tim hpaji sharin yang ban mi hte chye chyang kunghpan wa nna masah lahkam hpe dep lu ai. Sang daw yang, BC 3500 hkan nna chye chyang kung hpan sai Miwa, Kala(India), Babelon(Iraq), Egypt amayu masha ni hpe dep lu ai. Pyi lai kau lu ai.


Hpaji lakang lung yang mahkrum jaw ra ai. N rai yang majoi mi aten shama nna hpa akyu n pru chye ai. Tan kade chye yang dai hte gingdan ai amu hpa baw galaw na ngu ai myit madung rawng ra ai. Moi 1960 jan 1970 jan dakkasu jawngma langai mi tsun ai. Ngai gaw BA awng jang myit dik sai. BA sha awng jang gaw bum yi galaw sha tim rai sai, nga nna tsun ai. Bum yi galaw sha na rai yang hpa la mi 4 ning tup dakkasu lung nna taen shama, gumhpraw jahtum hkawm n ra na re. Dai wa ya kanang du sai kun n chye ai. Kani lu nna si mat sai zawn nga ai. Ndai Zawn hpaji kaba sharin la nna hpa asung n jashawn ai mashani grai lahpawt hpa rai nga ai. Dai majaw tinang hte htap htuk ai, myit lawm ai, kung kyang ai kanbau bungli hta hkan nna tinang a buga, tinang a aprat hta akyu rawng na hpaji hpe sharin mahkawng la chye ra ai. Nkau mi gaw,"E...Myen mung na degree gaw hpa chye ai ni hpe majoi jaw ai degree wa re," nga nna stun jahpoi chye ma ai. Hpa n chye tim mungdan asuya langai mi jaw ai degree re ai majaw maigan de du ai shaloi,"Ngai ndaai awng da ai," ngu nna madun dan na lakmat(credential) mai byin ai.
Degree shawng lu ai hpang shinggan de sharin la nna galaw lu galaw sha chhye ra ga ai.

Myen mung kata e KG 2 ning, Jawng kaji laning mi, tan 10 du hkra 10 ning ning ngut ai hpang College(Hkawlik) dakkasu de shang lu ai. Kaga maigan mungdan nkau mi hta jawng kaji lung ai shaning kaw na sawn ai majaw tan 12 awng ai hpang College shang na sanpoi htai lu ai. Jawng lung shaning hku sawn yang nau n shai ai. College n kam sa yang, shing n rai cololege shang san poi (entrance exam) n awng yang, kan bau bungli sharin ya ai professional jawng amyu myu de mai sa ai. Dai awng lakmat ni hpe Cetificate of Completeion rai rai, Diploma rai rai shamying nna jaw ma ai. Ga shadawn: Dip. Linguistics, Dip.Theol(Diploma in Theology),DMS(Diploma in Mission Studies), Dip.Min(Diploma in Ministry), CTh(Certificate in Thelogy),GTh(Graduate in Theology), LTh(Licentiate in Theology), DipTh(Diploma in Theology), Dipploma in Nursing, Diploma in Hotel Managegement, Diploma in Tourism, Diploma in Islamic Studies, zawn re ai rai nga ai. College nnan lung ai ni a atan hpe uundergraduate studies program ngu ma ai. mali ning lung ra ai. Mungdan nkau mi hta college 2 ning lung ngut jang awng lakmat amyu mi jaw ma ai. USA hta gaw AA(Associate of Arts) ngu ai lakmat jaw ma ai. mali ning awng la sai ni hpe gaw tinang la ai Major subject hta hkan nna first degree ngu ai Bachelor degree janmau shagrau ma ai. Ga shadaw: BA(Bachelor of Arts), BSc or BS(Bachelor of Science,BE(Bachelor of Engineering),BAg or BSc (Agri)hkai sum hpaji, LLB(Bachelor of Laws) Upadi tara masa hpaji, BLitt(Bachelor of Letters), BEd(Bachelor of Education), BTh(Bachelor of Theology),BARS(Bachelor of Arts in Religious Studies), BBA(Bachelor of Business Administration, BMus(Bachelor of Music), zawn re ai hpaji jan mauni rai nga ai. Bachelor ngu ai gaw hpaji brang tung brang la ngu ai rai nna mungkan hpaji hta kung sai ngu tsun mayu ai rai nga ai. Bachelor degree hkrai rrai tim langai hte langai manu n bung nga ai. Sharin la ai aten ni mung naw shai nga ai. Ga shadawn MBBS(Bachelor of Medicine and Bachelor of Surgery) tsi hpaji hpe 6 ning 7 ning sharin la nna tsi du(medical doctor) byin wa ai. BEd, BSc(Agri), LLB ni hpe 5 ning sharin ra ai. BRE(Bachelor of Religious Education) hpe mungdfan nkau mi hta Bachelor degree langai ngai lu sai ni 2 ning sharin tim mungdan nkau mi hta tan 10 awng sai ni 3 ning sharin la ma ai. BD(Bacxhelor of Divinity) gaw Bachelor rai tim second degree re ai majaw ya MDiv (Master of Divinity) ngut galai shamying ma ai. BMIn(Bachelor of Ministry) hte BMiss(Bachelor of Missiology) ni gaw laning mi hte shangut la lu ai degtree ni rai nga ai. BPhil(Bachelorof Philosophy) hpe England mungdan dakkasu nkau mi hta laning mi hte shangut la lu ai. Ndai hpaji janmau ni gup la lu jang dai hte gingdan ai bungli ni hta shang gawlaw lu na rai nga ai.

Bachelor degree lu sai hpang matut nna hpaji sharin hpunghjat la na maka kap yang, Master degree hpe sharin la na rai nga ai. Master ngu ai gaw Madu, ngu ai rai nga ai. Hkrak nga yang Master degree lu sai wa gaw masha ni kaw nchyang hkan shang ai hpan n rai sai. Tinang nan bungli hpaw nna masha ni hpe shabrai jaw ai madang rai ra sai.BA awng da ai wa gaw MA(Master of Arts) matut sharin la mai ai. BS or BSc awng da ai wa mung MSc(Master of Science) matut sharin la na rai nga ai. Dai hte maren ME(Master of Engineering), Mdiv(Master of Divinity),MPhil(Masterr of Pholsophy), ME(Master of Engineering), MLitt(Master of Literature), MMSc(Master of Medical Science), MMus(Master of Music), MMiss(Master of Misssiology), MRE(Master of Religious Education),MMin(Master of Ministry), MTh or ThM( or MTheol.(Master of Theology), MEd(Master of Education), MBA(Master of Business Administration), STM(Mater of Sacred Theology) ya prat hta MTS(Master of Theological Studies), LLM(Mater of Laws) zawn re ai degree ni rai nga ma ai. Ndai Master degree ni hpe jawng nkau mi hta kaning mi hte shangut la lu ai. Jawng nkaumi hta 2 ning laman shangut la lu ai. Jawng nkau mi hta 3 ning laman shangut la lu nga ai. Dai gaw jawng a tara hte mung seng ai. Tinang a atsam hta mung hkan ai.

Mater degree hpe amak kaja hte awng la lu sai ni gaw Doctorate degree ngu ai doctoral studies de lahjkam lu na rai nga ai. Dai gaw hpaji munu rai nga ai. Tinang sharin hka ja wa ai hpaji subject hta tsaw dik ai madang na hpaji janmau rai nga ai. Doctor hpaji madang hta gaw kadai mung garai n mu sawk tam da lu ai lam ni, manghkang lama ma a mahtai ni hpe sawk tam gyin shalat ai madang rai nga ai. Mungkan ntsa e ndai madang de sai hpaji ninghkrin ni gaw research ngua ai sawk sagawn bungli amyu myu hpe woi hpaw nna jawng, dakkasu hkan lang na laika textbook ni hpe shapraw ma ai. Mung up asuya ni hpe hpaji jaw ma ai. Ana ahkya amyu myu hpe tsi shamai lau ai tsi mawan ni tam sawk shapraw ya ma ai. Hpaga ymga bungli, nawku hpung manghkang ni hpe hpyan nn mahtai kaja jaw let mungkan masha ni hpe woi awn wsa wa ai rai nga ai. America mungdfan hta ndai zawn re ai hpaji ninghkrin ni hpe bau rem da nna Think Tank ngu shamying ma ai. Hpyan la yak ai laja lana manghkang ni pru jang ndai ni hpe mahtai tam shangun ma ai. Mungdan nkaumi gaw ndai zawn kung kyang nna tinang hta grau chye chyang ai ni hpe hkrit ai majaw gyam sat kau chye ma ai. Nang nau ram ai, anhte kaw hkum lawm nga nna ma ni ginsup ai hta n shalawm ai zawn re ai majaw shabrai kaba jaw nna ndut n dang, wang lu wang lang rai myit sawk shapraw na ahkang jaw ai mungdan kaba ni de ndai hpaji ninghkrin ni hprawng shingbyi mat ai hpe brain drain (Bawnu kayun ai) ngu shamying ma ai. Dai ni USA DVD lottery jaw ai gaw mungkan jut nnaw shagun na hpaji ninghkrin ni shanhte kaw sa wa na matu dawn ai ladat amyu mi mung rai nga ai. Doctorate degree amyu myu nga shajang ma ai. Ga shadawn: PhD(Doctor of Philosophy),LLD(Doctor of Laws), DE(Doctor of Engineering), DBA(Doctor of Business Administration),ThD or DTh or Dr Theol.(Doctor of Theology), EdD(Doctor of Education), DRE(Doctor of Religious Education),DMin(Doctor of Ministry), DMiss(Doctor of Missiology), DLitt or LittD(Doctor of Letters),STD(Doctor of Sacred Theology) ya prat hta sexually transmitted disease hte laika hkum kadun bung ai majaw ndai degree hpe n jaw sai, DPS(Doctor of Pastoral Studies), DBS(Doctor of Biblical Studies),MD(Doctor of Medicine) England mungdan hta ndai hte bung ai FRCS(Fellow of Royal College of Surgeons), DHL(Docor of Humane Letters), DMus(Doctor of Music) ni zawn reai rai nga ai. PhD in Communicatyions, PhD in Nuclear Science, PhD in Buddhist studies, PhD in Islamic studies, ngu nna mayu myu nga ai hte maren PhD in Kachin Studies mung nga mai ai n rai ni??? Maigan du sai Jinghpaw Wunpawng ramma ni hpaji kaba sharin la nna anhte a buga garai shamat kau yang sawk sagawn ai amu lawan wa galaw ga. PhD in Zoology la nna anhte buga na dusat du myeng ni a lam wa sawk shapraw, ka mazing da ga. PhD in Geology la nna anhte buga na nhprang sut rai ni hpe sawk sagawn ai lam galaw ga. PhD in History la nna Wunpawng Myu sha ni a labau hpe sagawn ga. Oral History hpe sawk shapraw ga. PhD in Media and Entertainment la nna(la ma nga yang) Ninggawn wa Magam lamu ga dup ai video sumla hkrung ni, cartoon films ni, shapraw ga. PhD in Medical Science la nna(nga yang) AIDS shamai tsi(hkangse sai mai ai nga ma ai), SARS ana shamai tsi, sawk shapraw lawm ga. PhD in Linguistics sharin la nna Jinghpaw grammar, phonology sha n ga Proto Kachin languages sawk shapraw ga. Dai hta grau nna moi prat dusat dumyeng ni hte ga hkrum ai zawn ya mung dasau damyeng ga byan ya ai hpaji, duasat dumyeng ga gale ai jak(auto-translation machines) ni gyin shalat shapraw ga. Lani mi na nhtoi hta Dr Marip Gam , Dr Lahtaw Krang, Dr Nhkum Naw Mai, Dr Seng Hkawn, Dr Ting Ying, Dr Zuk Dai, Dr Sumlut Tang, Dr Ahpu, Dr Nang Ram, Dr Ah Di, Dr Hkaw Kyang ni ka ai laika buk kaba ni mungkan dakkasu kaba ni alaika dum hkan mara nna, dakkasu jawng gawk hkan sharin ai textbooks laika ni n byin wa na ngu kadai tsun lu a ta?Lani mi n nhtoi hta PhD in Kachin Studies hpe Myitkyina mare kaw mungkan mungdan shara shagu na shanhpraw shan chyang jawng ma ni n sa sharin la na ngu kadai tak tsun lu na rai nga a ta? Lani mi Kachin Scientists ni mung lamu ganghkau jak shagan hpe hkang ai rung gawk kaw n dung lawm lu n angu kadai tsun lu a ta? Kachin professors ni mung mungkan dakkasu kaji kaba ni hta jawng up tai nna hpaji sharin ya ai nhtoi mung du wa na n rai ni?

No comments:

Post a Comment